作息有序

有好多創業嘅朋友，經常講要通幾多晚頂，佢地好似覺得通得多頂就等同有幾咁搏殺，有幾咁對得住自己(同埋間公司)。打工嘅朋友，我冇說話好講，有時真係只可以揀通頂或遞信。不過自己搞生意，又要狂通頂，肥黃就唔多認同。


我係一個作息有序嘅人，通常

6:45am起身
7:15am送老婆落樓搭車返工
7:30am左右返回屋企
8:00am左右出門
8:45am或之前返到公司(如果唔駛返大陸)
多數情況下6:30pm前會離開公司
7:15pm左右返到屋企
11pm前會瞓

星期六，日最少有一日留係屋企，會遲d起身，多數8:30am，或午睡，一星期最少跑30分鐘步(我知好少)。公司內大部份同事都少OT,一般都係6:30pm前走人，5 days 工作。

肥黃嘅公司未上軌道，都係處於今年唔知下年事嘅情況，但係我都冇要求自己要通頂。當然唔係肥黃睇得開，亦唔係冇野心，只係經過計算覺得唔值。雖然回到家後會工作，多數星期六，日都會輕量工作，但就生理時鐘黎講，我應該算係健康嘅。

之前睇過明珠台一個節目，講睡眠同生理時鐘，簡單d講係人要瞓，瞓唔夠就欠左身體債，一定要還，可能係要之後瞓返夠，如果一路都瞓唔夠，日後一定會要你一次過瞓返晒佢，而且冇得起身。其實個設計幾公正(雖然未必公平)，總之你個身體一日係要瞓8個鐘，你好難長期每日偷到1個鐘黎自己用。

我係做生意嘅，只計 cost and benefit。返去之前講嘅工作問題，通頂嘅人，好多時都會忘記左計一樣野，就係通完頂後條數，可能通完兩晚頂後要瞓返24個鐘，你除返之後其實工作時間一d都冇多到，又或者再俾個借口自己，通完 兩 晚頂，瞓左一日，睇返場下午場先，除時hea多一日先正常做返野。同一個作息有序，每日平均做9個鐘野嘅人，生產力邊個多d我唔敢講，但係就算通兩晚頂係多d，我都肯定唔會多好多，所以我嘅睇法係通頂做野嘅人唔一定等同勤力同高生產力。

如果有得揀，作息有序會比較符合長線做生意模式。