一邊打工，一邊創業

一邊打工，一邊創業，應該有很多創業人都會經歷過這個過渡期。肥黃總共打了四年全職工，其中大約一年半是「專心打工」，兩年半時間是一邊打工，一邊創業。

很多人在回顧當時的決定時，都會說沒有後悔，其實講法好假，我就後悔打了四年工了。如果俾我再揀，我會選擇即時創業或最多打半年工再創業，打半年工因為要儲少少錢去捱一年。

肥黃2003年大學畢業時，銀行戶口有約8萬蚊，讀大學時肥媽先支付肥黃的所有學費，申請到的Grant Loan 一年約兩萬，就入落肥黃的生活費，所以肥黃讀大學時就算唔做part-time 都夠駛，而且肥黃有做野，駛費唔多，所以有8萬蚊剩，對一個岩岩畢業嘅大學生黎講算唔錯。當然，呢8萬當中有6萬係借返黎，每個月要還Grant Loan，所以我Net Asset 其實只得2萬，但Grant Loan 一個月只係還一千蚊左右，所以你話我當時有8萬Free Cash亦講得通。

當時我當然唔知，不過而家睇返，其實8萬係夠晒捱一年，甚至兩年的，況且創業時間內亦不一定零收入，所以，當時我只要做一個決定，1) 唔俾家用，2)控制每月駛費在3千內(當時其實已做到)，肥黃就可以即時創業，買回四年的時間。當時月入都係平均兩萬多d，今日肥黃嘅被動收入都最少十萬，而家睇返，唔後悔先奇。當然，時間上差左十幾年，唔可以咁比較，但後悔沒更早創業是真的。

但就算我當時沒有錢，其實打半年工，死慳半年，無理由儲唔到4~5萬，所以俾我再揀，我都最多只會打半年工，然後即時創業。

一邊打工，一邊創業，我見到的最大問題唔係唔夠時間，而係沒人追殺你，好易令你適應打工的生活，"become part of it"。事實上肥黃的朋友剛畢業時個個都想「搵d 野搞下」，不過朋友們月薪上左3萬開始，個個都靜晒，機會成本太高了，買多兩手騰訊算啦。當時月薪3萬留著打工的，過了差不多十年了，他們的月薪現在大約5~6萬，值唔值? 見仁見智。

最後，列少少建議:

1) 可以一邊打工，一邊創業，不過唔好打多過兩年

2) 揀工可以Sort by 最高人工的，然後在當中揀可以俾到你最多時間創業的

3) 工作經驗有用，但半年時間咩都學晒，再見多十年都只係差唔多野，所以千萬唔好諗住「打多幾年工，攞多d經驗先」。你唔會係打工度攞到幾多做生意嘅經驗。

4) 肥黃打工時當然都有用少少公司時間做自己野，不過我都有底線，交足貨俾老細先，有時間剩先做，打工時亦有幫老闆OT，有時仲要通宵做。你想創業當然是好事，不過老闆都真金白銀請你，一邊打工，一邊創業，只要安排得好，係可以做到你有得贏，老闆又唔會輸的。

5) 諗住辭職創業，直接同老闆講你去創業就ok，好老闆會欣賞你，衰老闆你都唔諗住返去，所以辭職原因是創業，絕對係一個好原因，當然，係假設你唔好同舊老闆搶客先講得通。