轉型

肥黃公司近來出現了一個重要的'轉型',我地放棄左IT嘅業務,全力做Trading,係呢度都分享少少經驗,希望幫到想創業嘅朋友，同希望可以俾佢地有多個角度了解一下香港d中小企嘅實情。

背景
肥黃公司主要經營兩個業務，IT及Trading，簡單d講，我地用IT協助Trading運作，包括工作流程，市場推廣等，很早前我地已考慮過IT部份是否可以獨立出來，另做一盤生意，形式就似幫Trading 那邊一樣，不過係幫街客，賺街外錢。就係咁，我地就經營住兩個業務，我相信係香港好常見，我個Friend前舖做成衣，後舖做物流，最賺錢其實係做回收生意，之前係大陸仲Hold左間建材工廠，幾廿泛。

收入
IT方面其實一路都有錢賺，由於前期已投入，而家都算係收成期，數目雖然好細,但純利好過買一層普通太古城單位收租，對我地d小企黎講算係唔錯。雖然IT收入跟Trading比大概係一比十，但由於 IT 業務邊際利潤比較高，所以我地傾向將業務移去IT。

經營
經過幾年時間，IT似乎依然做唔起，有錢賺，不過唔見得有咩增長，我地經營類似租用Server嘅生意，係香港有太多供應。雖然我地總會分到個餅，不過香港市場細，未來亦唔見有咩增長。做IT 科網等要講Scale，即使投入大，不過做多一個客嘅marginal cost 好低，所以唔同做地產、投資等，下下都要大deal，IT通常都係要銀碼細，不過單夠多。我地嘅情況係一二百蚊生意都做，一二千蚊生意係養住我地，偶然一張一兩萬嘅單就係賺錢。

轉戰其他市場
唔好信人講靠Internet去開拓其他市場，個picture唔完整，Internet 係個media，重點都係產品本身同要對個市場有認識。打個比喻，而家由香港搭飛機去印度只要10分鐘，即日可住返，距離拉近了，不過印度的營商環境冇變，入面d人都係講緊幾十種語言，入口要行賄，疏通，你對印度嘅認識亦唔會增加左，如果只因為搭飛機去印度時間大量縮小了，而投資去印度做生意，多數會蝕本。Internet 只係程機，其他野無變過。

香港市場細不用多說，我地當然有嘗試開拓其他市場，不過唔見得有成績，因為我地根本唔熟悉當地市場，亦唔commit 去開拓(個個市場都唔認識，唔知commit去開邊個)，所以亦冇增加到認識，做個網站，賣下廣告就諗住開拓到一個市場，想法太幼稚。

專注很重要

開始時其實我地同大部份創業人都一樣，就係咩都想做，Never Say No. 我全職創業1-2年左右發現問題(後知後覺)，已開始修正，第一，唔開新野，同本業無關嘅野我唔做，集中火力。問題係，我減無可減，仲有兩個業務:IT + Trading，而兩個都有錢賺，是但一個都唔想cut。就係咁，hold住左兩個business ，如是者再過多幾年。

由於多年黎分散左兩個業務，所以兩個都做得不太出色。最近警鐘響起，Trading生意開始蝕錢! Trading 業務其實一直有增長，不過我地嘅成本比業務增長更快，所以今年個cash flow 少左好多。思前想後，大概12年尾我作出決定，只做Trading，考慮的原因可以寫一篇講下。

13年是我全程專注做一個business 嘅一年，有代表性。13年已過，可以總結一下成績，Trading生意增長50%以上，回復正現金流，Cut左Team IT人，現在全公司專注做一個Business，較易管理，IT業務雖然無做開發，不過仍有租收，收入真正袋到入袋，可能比繼續開發賺到更多。

在這裡給想創業的朋友說一下，世界有太多創業的心法，但如果只要我選其一，我一定會選"專注"。希望大家唔好三心兩意，你只需要將一件事做到最好，市場就會獎勵你，將10件事都做少少，有頭無尾，對世界是一點貢獻都沒有的。